Tuesday, June 02, 2009
ကျွန်မနာမည်နဲ့ ဘလော့ခ်တင်ထားပြီး သူ့ချည်းပဲရေးနေတော့ ဘယ်ဖြစ်မလဲနော့.... ကျွန်မလည်းရေးအုံးမယ်။ ကိုယ့်ကိုကိုယ်မဏ္ဍာပ်တိုင်တက်လိုက်အုံးမယ်.. ကျွန်မက ကိုအောင်ဒင်ရဲ့အကြင်မယား ယုကီပါ။ အများသိတဲ့အတိုင်း သမီးကလေးတစ်ယောက်ရှိတယ်လေ။
သမီးကလေးဆိုလို့ သမီးကို မြန်မာပြည်ပြန်မွေးတုန်းက မြန်မာပြည်မှာကြုံခဲ့ရတဲ့အဖြစ်အပျက်ကလေးတစ်ခုဝေမျှချင်တယ်။ အဓိကပြောပြချင်တာကတော့ ပြည်သူ့ဝန်ထမ်းတစ်ယောက်ဖြစ်ပေမဲ့ ပြည်သူတွေကို ကူညီချင်စိတ်မရှိတဲ့ ဆေးခန်းဝန်ထမ်းတစ်ယောက်အကြောင်းဝေမျှချင်ယုံ သက်သက်ပါ။
ချစ်စရာသမီးလေးကို ပြီးခဲ့တဲ့နှစ် ဖေဖေါ်ဝါရီလ က အက်စ်အက်စီဆေးရုံမှာ ခွဲစိတ်မွေးဖွားခဲ့ပါတယ်။ သွားရလာရအဆင်ပြေအောင် အမျိုးသားရဲ့အိမ်နဲ့ မနီးမဝေး အက်စ်အက်စ်စီမှာ မွေးဖွားခဲ့တာပါ။ သမီးလေးကိုမွေးပြီး သူလေး လသားအရွယ်ဖွံ့ဖြိုးတိုးတက်မှုအတွက် သမီးမွေးတုန်းက ကြည့်ရှုပေးခဲ့တဲ့ ကလေးဆရာဝန်တစ်ယောက်ဆီမှာ ဆက်လက် ပြသခဲ့ပါတယ်။ အရင်ကပေါ့ပေါ့နေပြီး ဘာမှသိပ်မလေ့လာထားတဲ့ ကျွန်မတစ်ယောက် အဲဒီအချိန်ကျမှပဲ ကလေးကို ကာကွယ်ဆေးထိုးနှံဖို့ မိခင်နို့ပဲ တိုက်ဖို့ အစရှိတဲ့ ကိစ္စ၀ိစ္စတွေ နားလည်စပြုရုံဖြစ်လာတဲ့အချိန်ပေါ့... ဒါနဲ့ပဲ သမီးကလေး ၁၄ရက်သမီးအရွယ်မှာ ဆေးခန်းတစ်ခါပြန်ပြရပါတယ်. အရာရာအဆင်ပြေလားပေါ့။
အကူအဒေါ်ကြီးနဲ့အတူ ဆေးခန်းသွားပြ ပြီးတော့ ဆရာဝန်ကတစ်လခွဲသမီးအရွယ်ကျရင် ပြန်လာဖို့ချိန်းပေးပါတယ်။ သမီးကလေးရဲ့ ကိုယ်အလေးချိန်က သိသိသာသာ မတက်လာတဲ့အတွက် ဆရာဝန်က အားဆေးညွှန်ပေး၊ အခြားလိုအပ်တဲ့ဆေးတွေလည်းညွှန်ပေးလိုက်ပါတယ်။
ဆရာဝန်ချိန်းတဲ့အတိုင်း တစ်လခွဲအရွယ်သမီးလေးကိုပိုက်ပြီး ကာကွယ်ဆေးထိုးနှံပြီးငွေရှင်းတော့ ငါးသောင်းကျော်ရှင်းလိုက်ရတော့ သမီးလေးကိုယ်အလေးချိန်တက်လာလို့ ပျော်နေတဲ့ ကျွန်မ အတော်လေးမျက်လုံးပြူးသွားတယ်။ အိမ်ပြန်ရောက်ပြီး ခင်ပွန်းသည်ဆီက ဖုန်းလာတဲ့အခါ သူက စင်္ကာပူအိမ်ဘေးခန်းက အစ်မက ဒေသန္ထရဆေးခန်းမှာ သွားထိုးရင် တစ်ပြားမှပေးစရာ မလိုတဲ့အကြောင်းပြောပြတယ်လို့ဆိုပါတယ်။
အဲဒီတော့ ကျွန်မ သမီးကလေး နှစ်လခွဲအရွယ်ကျရင် ဒေသန္ထရဆေးခန်းမှာကာကွယ်ဆေးထိုးနှံနိုင်ဖို့ စိုင်းပြင်းတော့တာပေါ့။ နေပြင်းပြင်းပူနေတဲ့ ဧပြီနေကို ဂရုမထားပဲ သမီးကလေးအိပ်ချိန်မှာ မနီးမဝေးမှာရှိတဲ့ ဒေသန္ထရ ဆေးခန်းကို အမျိုးသားရဲ့ ကြီးကြီးနဲ့အတူချီတက်ခဲ့ပါတယ်။ မှောင်မှောင်မည်းမည်း အခန်းကျဉ်းကလေးတစ်ခုထဲမှာထိုင်နေတဲ့ သူနာပြုဆရာမကြီးတစ်ယောက်နဲ့ အဆင်သင့်တွေ့ပြီး အကျိုးအကြောင်းရှင်းပြတော့ သူက နောက်တစ်ပတ်သမီးကလေးနှစ်လခွဲအရွယ်လာခဲ့ဖို့ချိန်းပါတယ်။ မှတ်မှတ်ရရ နာဂစ်မတိုင်ခင်တစ်ရက်ပေါ့။
ချိန်းထားတဲ့မနက်မှာ နာဂစ်အစပျိုးမိုးဖွဲဖွဲအောက်မှာ (အဲဒီတုန်းကတော့ ကြောက်မယ်ဖွယ် မုန်တိုင်းအစပျိုးမှန်းမသိပဲ) သမီးကလေးရဲ့အဖိုးနဲ့ အတူသမီးကလေးပိုက်ကာရောက်သွားတော့ပါတယ်။ သမီးလေးကို ဆေးမထိုးခင် ၀န်ထမ်းတစ်ယောက်ညွှန်ပြတဲ့ အခန်းထဲဝင်ပြီး ဆေးခန်းစာအုပ်ဖိုးပေးပြီး စာအုပ်လုပ်ရတယ်။ ပြီးတော့သူက ကလေးကိုအနီးမှာရှိတဲ့ အ၀တ်ပုခက်ထဲထည့်ဖို့ညွှန်ပြတဲ့အတွက် ကျွန်မအူကြောင်ကြောင်နဲ့ထည့်လိုက်တော့ ကလေးကိုယ်အလေးချိန်ချိန်တာတဲ့။။ကတ္တားနဲ့ပုခက်ကိုချိတ်ထားပြီး ကိုယ်အလေးချိန်ချိန်ပေးတာတဲ့ ...အံ့ရော...
အဲ..ပြီးတော့ သဲအိတ်တွေဆင့်ခင်းထားတဲ့လမ်းအတိုင်း ချော်မလဲအောင်လျှောက်သွားပြီးတစ်ခြားအခန်းထဲကို ၀င်ရပြန်တယ်။ ဟိုတစ်နေ့က ကျွန်မတို့ သွားခဲ့တဲ့အခန်းပဲ. အခန်းထဲမှာတော့ ဟိုနေ့ကနဲ့မတူပဲ ဆရာဝန်ကုတ် ၀တ်ထားတဲ့ အမျိုးသမီးတစ်ယောက်၊ သူနာပြုဝတ်စုံအနီဝတ်ထားတဲ့ ဆရာမသုံးယောက်ထိုင်နေပါတယ်။ကျွန်မတို့တွေ့ခဲ့တဲ့ သူနာပြုဆရာမတော့မတွေ့ခဲ့ပါဘူး။
သမီးကလေးရဲ့ ရာဇ၀င်ကို ယူတဲ့အခါ ဆရာဝန်မလေးက ကာကွယ်ဆေးထိုြး့ပီးတဲ့ ရာဇ၀င်ကိုသိလိုတဲ့အတွက် ကျွန်မက အက်စ်အက်စ်စီဆေးမှတ်တမ်းကိုထုတ်ပေးတဲ့အခါ ဆရာဝန်မလေးက ငါးမျိုးစပ်ဆေးကို သိပ်နားမလည်တဲ့အတွက် သူနာပြုဆရာမတစ်ယောက်က စာအုပ် ဆွဲယူ ဖတ်ကြည့် လိုက်ပြီး“ သြော် ကလေးအထူးကုနဲ့ အပြင်ဆေးခန်မှာပြထားတာပဲ. ဘယ်လောက်ပေးလိုက်ရလဲ“ လို့ ပြုံးတုံးတုံးနဲ့ လှမ်းမေးပါတယ်။
သူဘာပြောချင်တာကို သိပ်နားမလည်တဲ့ ကျွန်မက ထုံးစံအတိုင်း အစအဆုံးရှင်းပြပြီးတော့ အဲဒီဆရာမကပဲ ”အဲဒီဆေးခန်းမှာပဲ သွားထိုးလိုက်ပါ။သူတို့က မထိုးပေးဘူးဆိုတော့မှ ပြန်လာပေါ့“ညစ်ပြုံးပြူံး ပြီး ပြောပါတယ်။ .. ကဲ ကျွန်မလည်းဘာမှမတတ်နိုင်ပဲ ပြန်လာရပါတော့တာပေါ့။ ဒါ သူတိုခေတ်လေ...
ဒေသန္တရဆေးခန်းတွေမှာရှိတဲ့ ဒီဆေးတွေဟာ မြန်မာနိုင်ငံက ကလေးတွေကို ကလေးရောဂါတွေက ကာကွယ်နိုင်ဖို့ ယူနီဆက်ဖ်က ပေးလှုထားတာပါ။ ယူနီဆက်ဖ်မှာ သူငယ်ချင်းရှိလို့လှမ်းအကြောင်းကြားချင်ပေမဲ့ အချင်းမများချင်တော့တဲ့အတွက် ကလေးဆေးတွေကို ပြနေကျဆေးခန်းမှာပဲ အပြီးသတ်ထိုးနှံလို့ စင်္ကာပူကိုပဲ သမီးလေးနဲ့အတူ မြန်းကြွှလာခဲ့ပါတော့တယ်။ အပြန်လမ်းပေါ်မှာ နာဂစ်ဒဏ်ကြောင့် အဆောက်အအုံပုံစံပျက်နေတဲ့ ဒေသန္တရဆေးခန်းကို လှမ်းမျှော်ကြည့်ရင်း ကျွန်မလို မိခင်ဘယ်နှစ်ယောက်လောက် ဒီလိုတွေ့ကြုံရလဲလို့ တွေးမိနေခဲ့ပါတယ်။
No comments:
Post a Comment